Почитувани комитенти,

Крај на година сме, а Владата сè уште не ги донесе измените на Законот за сметководствени работи. Ова ме потсетува на психологијата додека бевме студенти и познатиот виц:

„Колега, знаеш ли дека вовеле кинески како испит.
Ау, а кога се полага?
За три дена.
Фала богу има доволно време да го положиме.“

Еве и нашава Влада вака има уште цели десет дена да го донесе Законот и каде би се брзала - има доволно време.

Од друга страна барем имаме една среќна вест, а тоа е излегувањето на вакцината против веројатно најтешкиот невидлив непријател со кој сме се соочиле - COVID-19 и истата се надевам дека ќе започне како и во сите нормални држави, а со тоа процесот на имунизација би го завршиле до крајот на мај или јуни. Тоа ќе значи враќање во некоја нормала која одамна сме заборавиле како изгледа, а на сите ни е веќе неопходна.

Како и секогаш, ние да продолжиме да зборуваме за кои е посветено ова списание, а тоа сте Вие почитувани претплатници. Ќе го започнеме со сметководствен третман на разлики по попис, па ќе продолжиме со расходување на опрема и ситен инвентар од сметководствен и даночен третман. Најдоцна до првата половина на јануари 2021 година, даночните обврзници кои ги исполниле условите ќе треба да се регистрираат за целите на ДДВ, а пак даночните обврзници кои се регистрирани за целите на ДДВ, а кои веќе не ги исполнуваат условите, ќе треба да поднесат барање за дерегистрација. Во овој период се и подготовките за последната даночна пријава за 2020 година која има одредени специфичности во однос на другите даночни пријави.

Новини има во Законот за данокот на добивка, Законот за данокот на личниот доход, Законот за даночна постапка, како и во Законот за работните односи.

Како и секогаш, не ги запоставуваме ниту банките, ниту осигурителните друштва, ниту буџетските корисници и ги обработуваме разликите по попис, како и даночниот и сметководствениот третман на разликите констатирани со пописот.

Да ги заборавиме неволјите што ни ги предизвика престапната 2020 година, кои за жал оставија длабок траг насекаде во човештвото, да оддадеме почит на жртвите и да се сеќаваме на нив додека сме живи.

На крајот, да ни е СРЕЌНА НОВАТА 2021 ГОДИНА, да го победиме вирусот и да заживееме со полни плуќа така како што сите заслужуваме.

Со почит,

Др. Горан Рафајловски